A Universidade da Coruña acollerá un Taller Internacional sobre Computación Aplicada ao Experimento LHCb do Centro Europeo de Investigación Nuclear

• A reunión reunirá arredor de cincuenta científicos de diversas nacionalidades, entre eles 15 expertos en informática do propio CERN.

• A organización do evento está a cargo dos investigadores Veronika Chobanova, Diego Martínez Santos e Carlos Vázquez Sierra, todos eles membros da Facultade de Ciencias da UDC.

• Vincenzo Vagnoni, director do experimento LHCb, impartirá o seminario titulado “Do macro ao micro: unha breve viaxe a través da física de partículas moderna” o 31 de xaneiro ás 12:30 horas, que terá lugar no auditorio da Facultade de Ciencias e estará aberto a todo o público.

A Coruña, 24 de xaneiro de 2025.- A Universidade da Coruña (UDC) organiza, do 27 ao 31 de xaneiro, un obradoiro internacional centrado na computación aplicada ao experimento LHCb (Large Hadron Collider beauty) do Centro Europeo de Investigación Nuclear (CERN), con sede en Xenebra (Suíza). Este evento, que terá lugar na cidade da Coruña, reunirá arredor de cincuenta científicos de diferentes nacionalidades, entre eles 15 expertos en informática do propio CERN, e promete ser un punto de encontro para o intercambio de coñecementos e experiencias no campo da computación de alto rendemento.

Durante o obradoiro, os participantes abordarán temas moi relevantes como a computación de alto rendemento con GPU (Unidades de Procesamento Gráfico), a simulación de procesos físicos e o uso da intelixencia artificial no procesamento de datos. Estas áreas son fundamentais para o éxito do experimento LHCb, que require unha enorme capacidade de computación para analizar os datos obtidos na investigación sobre partículas subatómicas.

A organización do evento corre a cargo de Veronika Chobanova, investigadora contratada nos programas Ramón y Cajal e InTalent; Diego Martínez Santos, investigador distinguido do programa Oportunius da Xunta de Galicia e o investigador Ramón Cajal Carlos Vázquez Sierra, todos eles membros da Facultade de Ciencias da UDC.

Ao longo dos cinco días que dura o evento, impartiránse conferencias a cargo de destacados profesionais da UDC, como Susana Ladra e Verónica Bolón, ambas da Facultade de Informática da Universidade da Coruña e do CITIC, que compartirán a súa experiencia e coñecementos sobre as últimas tendencias en computación aplicada.

Outro punto destacado do obradoiro será a intervención de Vincenzo Vagnoni, director do experimento LHCb, que ofrecerá o seminario titulado “Do macro ao micro: unha breve viaxe a través da física de partículas moderna”, que terá lugar o 31 de xaneiro ás 12:30 horas no Salón de Actos da Facultade de Ciencias. Este seminario estará aberto a todo o público, brindando a oportunidade de achegarse ao mundo da física de partículas.

A UDC reafirma así o seu compromiso co avance da ciencia e a investigación, promovendo eventos que favorezan a colaboración internacional e o intercambio de coñecementos entre persoal experto de todo o mundo.