O programa InTalent xa botou a andar, e fíxoo de maneira exitosa. Moitos investigadores presentáronse á primeira convocatoria deste programa que impulsa a Universidade da Coruña e Inditex.
Hoxe falamos con José Mahía, membro da Oficina de Transferencia de Resultados de Investigación (OTRI) da UDC e coordinador científico do programa InTalent. O programa InTalent está enmarcado dentro do Programa de Apoio á Ciencia Excelente da UDC (berce) e está supervisado polo Vicerreitorado de Política Científica, Investigación e Transferencia.
José Mahía xunto a Javier Garrido, coordinador técnico de InTalent, desenvolven varias funcións na xestión do programa “desde a definición da convocatoria e dos criterios de avaliación da mesma ata a recepción, acompañamento e seguimento dos resultados da actividade investigadora, pasando polo apoio e asesoramento aos solicitantes e a asistencia á comisión evaluadora.”
1. Acabades de pechar a primeira convocatoria (2016) do programa InTalent Que valoración fas do programa ata o momento? Pódesnos adiantar cando sairá a próxima convocatoria?
A verdade é que estamos moi contentos de como nos están saíndo as cousas. InTalent é un programa pioneiro na captación de talento en Galicia e tivemos que montalo desde cero, o que supón un reto e un gran traballo, pero tamén nos permitiu crear o programa que queriamos e no que criamos. E a resposta dos investigadores foi simplemente sensacional.
Recibimos máis de cen solicitudes na primeira convocatoria, o que podemos considerar un gran éxito, aínda que tamén nos queda a sensación de non poder colmar as lexítimas aspiracións de moitos grandes investigadores que se interesaron por nós e inevitablemente quedarán fóra nesta primeira convocatoria. Por iso, queremos xa sacar a segunda canto antes. As nosas estimacións sitúana a mediados do ano 2017.
2. O programa InTalent é unha das iniciativas de retención e captación do talento levadas a cabo pola UDC. Existen máis?
É indubidable que a UDC está a apostar decididamente pola retención, recuperación e captación de talento investigador de excelencia. Fai aproximadamente un par de anos que puxemos en marcha o programa “berce” con estes obxectivos, ofrecendo unha serie de medidas concretas como o apoio técnico na presentación de solicitudes a programas nacionais e internacionais de ciencia excelente, especialmente do ERC. berce está máis vivo que nunca e InTalent é un paso máis adiante nesta dirección, creando nós o noso propio programa de ciencia .
3. Actualmente atópase aberta a convocatoria para as Consolidator Grants do ERC. Que lle ofrecedes aos investigadores que leven a cabo a proposta a través da UDC?
A todos aqueles investigadores interesados en presentar a solicitude para as Consolidator Grant del ERC brindámoslles apoio técnico na elaboración da proposta, pero sobre todo o que destacaría é a oportunidade de estabilización laboral, xa que todos os investigadores que logren o financiamento do ERC (en calquera das súas modalidades) e desenvolvan o seu proxecto na UDC dispoñerán dunha praza laboral indefinida baixo a figura de “investigador distinguido”, grazas a un acordo co goberno rexional (Xunta de Galicia). Esta posibilidade é independente do programa InTalent e é unha vía moi interesante para o retorno e captación de investigadores excelentes.
4. Entón, que ten que facer un investigador que se queira presentar a través da UDC?
Todo aquel investigador que queira concorrer a unha ERC a través da UDC debe contactar connosco a través de correo electrónico (intalent@udc.es) e solicitarnos unha reunión presencial ou a través de skype para estudar cales son as mellores opcións para cada investigador en función das súas condicións persoais.
5. Existen máis posibilidades de estabilidade laboral na UDC?
Si, de feito, o Ministerio de Economía, Industria e Competitividade acaba de publicar a convocatoria 2016 do Programa “Ramón y Cajal”. O obxectivo desta convocatoria é promover a incorporación de investigadores nacionais e estranxeiros cunha traxectoria destacada a centros de I+D por un período de 5 anos. Aínda que a continuidade non está garantida, ao finalizar este período, a lei establece que polo menos un 15 por cento das prazas a concurso de cada universidade debe ir destinado ao persoal investigador doutor que finalizase o Programa Ramón y Cajal. Nestes momentos, a UDC dispón dunha bolsa de prazas para as áreas dos beneficiarios desta axuda, o que supón que existe unha alta probabilidade de continuidade para aqueles investigadores “Ramón y Cajal” que desenvolvan o seu proxecto na UDC.
6. Que outras posibilidades de financiamento de ciencia excelente destacarías?
A oferta é moi completa, aínda que todas as convocatorias son tremendamente competitivas. A nivel nacional destacaría as Juan de la Cierva, tanto na modalidade de formación como de incorporación, cuxa convocatoria xa está publicada e está a piques de abrirse o prazo de solicitude. Están dirixidas a investigadores nas súas primeiras etapas posdoutorais.
A nivel europeo, ademais das ERC Grants en calquera das súas modalidades (Starting, Consolidator e Advanced), destacaría as Accións Marie Sklodowska-Curie que están moi ben dotadas economicamente e implican a mobilidade do investigador respecto ao país de residencia nos últimos anos.
A UDC pode ser un destino ideal para aqueles investigadores galegos e españois que pasaron por unha etapa posdoutoral no estranxeiro e queren continuar en España a súa carreira investigadora.
En calquera caso, gustaríame insistir na predisposición da nosa universidade para recibir investigadores excelentes a través de calquera destes programas nacionais e internacionais, polo que animo a todos os investigadores interesados en poñerse en contacto connosco para informarse de todas as posibilidades que podemos ofrecerlles.
